ياكويت

لا والله حشي تعبج راحه

الطريقة اللي ذكرتيها نفس الطريقة اللي حطيتها لج بهالرابط

http://www.ykuwait.net/vb/showthread.php?t=44872

اقريها على ما اروح بس اصلي وارجع لج

نطريني وان شاء الله راح نطلع بافكار حلوة

سامحيني يالغالية تأخرت بالرد عليج لاني اضطريت اروح للمستشفي

خلينا نبدي بسم الله

بالبداية واهم شي للمعلمة انها تكون فاهمة الدرس يعني المادة العلمية وكل ما كنتي متمكنه من درسج وقاريته عدل راح تزيد ثقتج بنفسج وتقدرين تبدعين

انا اخترت لج درس الزلازل والبراكين لانه حلو وممتع وكله تجارب وفيه العاب تربوبة جاهزة بالسوق وفي العاب انتي تقدرين تسوينها علشان جذية انا اخترته

في البداية تنسقين السبورة وترتبينها وتحطين شخصيات محبوبة للاطفال مثل هالصورة تري انتي مو ملزومة بالشغلة بس انا حبيت اسوي معاج درس في اشوية ابداع

بعد ما تنسقين السبورة تبدين الدرس بمستجد تربوي مثل قصة تعليمية او برامج إلكترونية او تجارب بديلة او العاب تربوية حقائب تعليمية اوراق عمل او علوم مسلية او الخيال العلمي

اذا ودج تعرفين اكثر عن انواع المستجدات التربوية شوفي هالبوربوينت فيه شرح لانواع المستجدات التربوية للتحميل اضغط هنا

شلون نبدي الدرس بتجربة بديلة و حطي مثلا حلاوة المنتوز تلقينها عند البقالات او الجمعية وهذي صورتها


وتقولين للطالبات لو حطينه هالحلاوة في كأس فيه مشروب غازي توقعون شنو راح يصير طبعا الطلبة ما يدرون شنو راح يصير فتسوين هالتجربة قدامهم وراح يصير ثوران مو طبيعي وفيه تشويق للدرس وتسألينهم هالثوران شنو يذكركم فيه ؟؟؟

راح يقولون على طول مثل البركان

من هالنقطة تقولين لهم اليوم درسنا راح يكون عن البركان وتحطين على السبورة الحقائق العلمية اللي راح يستفيدون منها الطلبة خلينا نشوف الاهداف اللي راح يتعلمها الطلبة :



عنوان الدرس : كيف تغير البراكين والزلازل سطح الأرض







</B></I>

شوفي يالغالية الحين كل هدف انتي كتبتية مطالبة اتنفذينة واذا ما تقدرين علية لا تكتبينه بالتحضير علشان ما تنحسب نقطة ضدج والصندوق اللي جنه جدول هذا يفهمج كل هدف شنو الوسيلة المناسبة له وطريقة عرض هالوسيلة وهو جزء اساسي بالتحضير

بالبداية احنا كاتبين يذكر شكل البركان فانتي اعرض صورة بركان لانه احنا حاطين بالجدول صور والطالب يذكر مميزات الجبل البركاني انه مثل الجبل العادي له فتحة في قمته

الحقيقة العلمية اللي يقولونها تروحين وتكتبينها على السبورة في الجزء اليسار (مكان الاهداف السلوكية ) وهي انه البركان هو جبل له فتحة في قمته

بعدبن نمسك الهدف الثاني وهو قراءة تعريف البركان وهالشي انتو استنتجتوه في الهدف الاول فانتي خلي الطالبات يقرون التعريف من السبورة طالبة طالبة

الهدف الثالث انتي حققتية انه يشاهد صورة بركان فانتي تقدرين تحطين مجموعه من صور على طاولتج وتطلبين من الطالبات انهم يستخرجون صورة البركان ويحطونها على السبورة وتكونين حاطة فيها معناطيسات علشان تلصق على السبورة وطبعا اي صورة تبين تعرضينها تكون في وسط السبورة واذا عندج كلمة جديدة للدرس مثل بركان تخلين وحدة من الطالبات تكتبها على السبورة جهة اليسار يعني خلي الحصة كلها نشاط والبنات تكون عندهم اوراق يكتبون كلمة بركان ويرفعونها لج بالصف

الهدف الرابع احنا ذكرناه وخلاص اذا تحبين تعرضين فيلم تعليمي يا كثرهم باليوتيوب عن البراكين او فلاش تعليمي او درس تفاعلي مثل ما حطيتلج في هالرابط هذا http://www.ykuwait.net/vb/showthread.php?t=44301&page=2

شوفي هالدرس التفاعلي وهو مستجد تربوي عن الزلازل للمشهدة اضغط هنا واذا تحبين خليها على الايباد والطالبة عن طريق التش تفتح الدرس التفاعلي وتتعلم عن البراكين

وبعدين وزعي على الطالبات اورق عمل فيها بيانات ناقصة عن البركان وهذا هو الهدف الخامس




وشجعبهم خليهم يشتغلون مجموعات وهذا يعتبر مستجد تربوي لانه العلم التعاوني يعتبر مستجد تربوي وخليها مثل مسابقات مجموعة فلة ومجموعه سبونج بوب ومجموعة دورا وجذيه والفايز يخذ هدية

بعدين اعرضي عليهم نموذج بركان وحطي بالفتحة اللي فوق كربونات الصوديوم (بيكنج بودر) وخل وراح تخرج الصهارة من داخل البركان الي الخارج

فنبهيهم انه البركان يجدث فيه نفس اللي بالتجربة الحمم البركانية تخرج من باطن الارض الي خارج البركان وتتراكم على جوانب البركان وتبرد

واخر هدف للبراكين وريهم يوتيوب يوضح لهم شلون البركان يساعد في تكوين جزر جديدة وتناقشي بهالموضوع واذا تحبين تطلعين على كتب العلوم عندنا مكتبة كاملة لكتب المناهج المدرسية من الابتدائي للثانوي على هالرابط شوفي كتب المرحلة الابتدائية http://www.ykuwait.net/vb/showthread.php?t=40906

والحين راح انتكلم عن الجزء الثاني من الدرس وهو الزلازل :

تعرضين افلام عن الزلازل او تسوين لعبة وهي مجموعة من كراتين العصير وتركبينهم فوق بعض على صينية وتقولين للطالبات كل وحدة عندها مجموعه من الكراتين وتحتهم صينية واللي تهز صينيتها بدون لا يطيح منها اي علبة اهي الفايزة وطبعا راح يكون تنافس بين المجموعتين والمجموعه الفايزة تحصل على نقطة

من خلال هاللعبة الطالبات راح يستنتجون تعريف الزلزال انه حركة في صفائح الارض الداخلية ينتج عنه وقوع المباني والبيوت

وانتي وريهم مصورات وافلام للزلازل اللي قاعدة تصير بالعالم حتي لو انج تشغلين اخبار والمذيع يقول خبر الزلزال والطالبات يعلقون على الخبر اللي سمعوه

بالاخير لازم تأكدين على الهدف الوجداني وهو اللي يشجع على القيم التربوية مثل نعمة الشكر وتقولين لهم الصفائح الأرضية بالكويت ولله الحمد مستقرة فيجب ان نحمد الله على هالنعمة لانه لولاها لكانت هناك كل سنة دمارات شاملة في البنايات السكانية

وبعدين تحطين على السبورة كم سؤال او ورقة عمل تحلها كل بنية بروحها وتجمعيها واتصلحينها

الحين انا شرحت لج الدرس ومن خلال شرحي شكلج تقولين شفيها معلمة تقول طالبات وطالبات ؟؟؟ اي يالغالية حسسي الدكتور وزميلاتج بالمحاضرة انهم طالبات وشجعيهم وعطيهم هدايا وصدقيني حصتج راح تكون رووووعه

الحين التحضير النموذجي للدرس هني http://www.ykuwait.net/vb/showthread.php?t=44872

الوسائل والفلاشات والانشطة المنوعة هني http://www.ykuwait.net/vb/showthread.php?t=44301

والمنتدي مليان اشياء مفيدة لج اذا عجبج الدرس نوكلي على الله واذا مو عاجبج ندور واحد غير و مشكلة انا معطلة وما واي شغل غير اعيالي الله يصلحهم

شاكرة لانظمامج بينا واذا زميلاتج يبون دروس ناديهم وحياهم الله باي وقت

فدييييييييييييييييييييييتج والله ماتقصريييييييييييييين
ان شاءالله يكون في ميزان حسناتج

اشكرررررررررررررج

حياج الله يالغالية واي شي تبينة لا يردج الا لسانج